Skip to content
AzadariVerse
AzadariVerse

Noha

Ana Ibne Makka o Mina

Nadeem Sarwar

2012Urdu
2012Urdu
Ana Ibne Makka o Mina is Nadeem Sarwar's 2012 noha based on Imam Zainul Abidin's address in the court of Shaam. The verses recount his declaration of lineage, the suffering of Imam Hussain's family and the way his sermon exposed the identity of the captives before the court.Read moreShow less
Lyrics DetailsTap to viewTap to hide
Category
Noha
Year
2012
Original
Urdu
Album
Abad Wallah Ya Zahra

Lyrics

Ana Ibne Makka o Mina Lyrics

WA
Now Playing
AZADARIVERSE · LISTEN & READ

Ana Ibne Makka o Mina

Ana Ibne Makka o Mina

Nadeem Sarwar

YouTube loads when you open Listen.

Ana Ibne Makka o Mina

Nadeem Sarwar

LYRICS

No verified timing yet · read alongside the video

Bayan karta hoon Darbar-e-Shaam ka manzar
Jahan the saat sau kursi-nasheen fitnagar
Yazid jhoom raha tha sharab pi pi kar
Aur aisi bazm mein afsos Aal-e-Payambar

Tha unke samne ek bad-kalam mimbar par
Bayan karta tha jhoote Yazid ke jauhar
Jab usne khatm ki taqreer bad-kalami par
Khateeb-e-jehl se bole ye Abid-e-muztar:

Ke tu ne khush kiya makhlooq ko zaroor magar
Khareeda qahr-e-Khuda tu ne mukhtasar zar par
Are jahan ho zikr-e-bad-atwar
Woh mimbar kab hai?
Lakdiyon ka hai woh ambar
Woh mimbar kab hai?

Kaha Yazid se:
Kuch main kahun, ijazat de
Yazid chup tha
To darbari sare kehne lage:
Yazid, de de ijazat
Ise bhi kehne de
Ye kya kahega
Larazta hai jo naqaahat se?

Sambhale tauq-o-rasan
Shan-e-Kirdigar aayi
Imam aaye
Ke mimbar pe Zulfiqar aayi

Ya Hussain
Ya Hussain

Jiska mimbar tha
Wohi bar-sar-e-mimbar aaya
Woh akela tha magar
Surat-e-lashkar aaya
Lab-kusha surat-e-Quran
Woh Haider aaya
Jab woh khamosh zaban
Bar-sar-e-darbar chali
Karbala mein na chali thi
Jo woh talwar chali

Ana ibne Makka o Mina
Ana ibne Zamzam o Safa
Ana ibne Ali o Fatima

Lehja-e-noor mein
Maula ne kaha Bismillah
Laiq-e-hamd-o-sana
Hai to wohi ek Khuda
Jisne hum Aal-e-Muhammad ko
Hai takhleeq kiya
Jisko maloom hai
Maloom hai mera shajra
Jo nahin janta
Woh sun le ta'aruf mera

Ana ibne Makka o Mina
Ana ibne Zamzam o Safa
Ana ibne Ali o Fatima

Humko Allah ne
Chhe khoobiyan bakhshin ba-Khuda
Ilm aur hilm diya
Aur dil-e-momin mein rakha
Hai samahat wa fasahat
Wa shuja'at wirsa
Kam na thin khoobiyan chhe
Jo ke ye izzat ke liye
Sifatein saat milin
Aur fazilat ke liye

Ana ibne Makka o Mina
Ana ibne Zamzam o Safa
Ana ibne Ali o Fatima

Hum mein awwal jo the
Woh Ahmad-e-Mukhtar hue
Koi Hamza
To koi Jafar-e-Tayyar hue
Hum hi Haider hue
Abbas-e-Alamdar hue
Humko Meraj-e-Risalat bhi
Imamat bhi mili
Humko mehrab-e-ibadat mein
Shahadat bhi mili

Ana ibne Makka o Mina
Ana ibne Zamzam o Safa
Ana ibne Ali o Fatima

Uska farzand hoon
Seh roz raha jo pyasa
Darmiyan zeen-o-zameen
Jiska raha tha lasha
Jiske sajde ke sabab
Khak bani Khak-e-Shifa
Khak aur khoon mein
Dooba tha amama jiska
Sum-e-aspa tale
Raunda gaya lasha jiska

Ana ibne Makka o Mina
Ana ibne Zamzam o Safa
Ana ibne Ali o Fatima

Ahl-e-insaf
Ab insaf se itna keh de
Jiski chaukhat pe
Salami ko farishte utre
Nok-e-naiza se laeen
Unki ridayein loote
Tumne khaime nahin
Allah ka ghar khak kiya
Kalma padh padh ke
Muhammad ka jigar chaak kiya

Ana ibne Makka o Mina
Ana ibne Zamzam o Safa
Ana ibne Ali o Fatima

Jiske parde ke liye
Ayat-e-Tatheer aayi
Sang barsate hue
Unpe yahan tak laye
Haif hai
Rooh-e-Muhammad se na tum sharmaye
Humne paband-e-rasan ho ke
Tujhe mara hai
Ibn-e-Marjana
Tu jeeta to nahin
Hara hai

Ana ibne Makka o Mina
Ana ibne Zamzam o Safa
Ana ibne Ali o Fatima

Baat jab khul gayi
Sadat-e-Muhammad hain yahan
Ro diye Ahl-e-Jafa
Ubhra baghawat ka saman
Aur isi shor mein
Hakim ne diya hukm-e-azan
Saat afrad jo
Yak-musht azan dene lage
Haq mein Sajjad ke
Darbari bayan dene lage

Ana ibne Makka o Mina
Ana ibne Zamzam o Safa
Ana ibne Ali o Fatima

Jab moazzin ne kiya
Kalma-e-takbeer ada
Bole Sajjad:
Buzurgi hai usi ko zeba
Jaise hi Naam-e-Muhammad
Moazzin ne liya
Mud ke hakim se kaha:
Tere irade bad hain
Ye Muhammad hain tumhare
Ke hamare jad hain?

Ana ibne Makka o Mina
Ana ibne Zamzam o Safa
Ana ibne Ali o Fatima

Aib kyun apne chhupata hai
Azanein de kar?
The agar tere Muhammad
To sitam kyun hum par?
Daal is tauq pe
Zanjeer pe ek baar nazar
Zakhm jo tu ne diye
Sab dil-e-beemar mein hain
Betiyan hain ye Muhammad ki
Jo darbar mein hain

Ana ibne Makka o Mina
Ana ibne Zamzam o Safa
Ana ibne Ali o Fatima

Tu to kehta hai
Ke hai dhong, na'uzubillah
Na Payambar
Na wahi aayi
Na Quran utra
Phir azanein bhi
Tu darbar mein hai dilwata
Le munafiq
Tere chehre se utarti hai naqab
Jiska munkir hai
Woh Quran tera lega hisab

Ana ibne Makka o Mina
Ana ibne Zamzam o Safa
Ana ibne Ali o Fatima

Is shaqawat pe bhi
Hum hare nahin
Jeet gaye
Naam azanon mein
Tumhare nahin
Hum jeet gaye
Kya ye Qudrat ke
Ishare nahin?
Hum jeet gaye

Yak-ba-yak Fath-e-Mubeen
Sabko nazar aane lagi
Marhaba Sayyid-e-Sajjad
Sada chhane lagi

Bole phir Abid-e-beemar:
Ye izzat dekhi?
Dekhi aye Takht-e-Sitamgar
Ye izzat dekhi?
Phir gaya tujh se
Ye darbar
Ye izzat dekhi?
Jiska hami ho Khuda
Kaun use zillat de?
Izzatein uski hain
Allah jise izzat de

Haye Hussaina
Haye Hussaina

Utre mimbar se
To Baba ke kate sar ne kaha:
Marhaba aye mere Sajjad
Ghareeb-e-Zahra

Mojiza Sarwar-o-Rehan
Falak ne dekha
Khutba-e-Zainab-o-Sajjad ne
Woh kaam kiya
Hashr tak zikr-e-Hussain ibn-e-Ali
Aam kiya

Details

Lyrics Details

Category
Noha
Year
2012
Original language
Urdu
Album
Abad Wallah Ya Zahra

Privacy preferences

Essential site features remain available regardless of your decision.

This control does not grant advertising consent. You can change your analytics choice at any time using “Privacy choices”.Privacy Policy.